Niveli i liqenit të Ohrit është rritur me 1 cm

Niveli i liqenit të Ohrit është rritur me 1 cm

Vetëm sot, liqeni i Ohrit, është rritur me 1 cm tjetër, duke shkuar 25 cm mbi maksimalen e lejuar.
Nga enti hidrometeorologjik, paralajmërojnë se nga e nesërmja deri të mërkurën priten reshje të reja dëbore, të cilat do t’a përkeqësojnë edhe më shumë situatën.
Pavarësisht paralajmërimeve të meteorologëve, nga trupi koordinativ thonë se po ndjekin me vëmendje nivelin e ujit, në liqenin e Ohrit.
Sipas trupit koordinativ, situata për momentin është e qetë dhe nën kontroll. Nga ana tjetër, konkluzionet e një grupi gjerman shkencëtarësh tregojnë se në rritjen e nivelit të liqenit të Ohrit, po ndikojnë edhe çrregullimet tektonike. Shkencëtarët gjerman që studiojnë liqenin e Ohrit prek vitit 2003 konstatojnë se një pjesë e maleve që ngrihen mbi Ohër dhe Strugë, po fundosen.
”Gjatë vitit ka më shumë se një 100 çrregullime tektonike dhe aq më tepër, ato pasqyrohen në vet basenin e liqenit.
Sipas rezultateve të shkencëtarëve nga Gjermania të cilat ende nuk janë përpunuar sa duhet, kemi edhe pjesë që ngrihen mbi vargmale.
Në Ladorishtë dhe Veleshtë, janë vërejtur ngritje malesh, ndërsa në pjesën tjetër fundosje dhe madje për disa centimetra.
Prandaj duhet që të vlerësohen rreziqet nga çrregullimet e mëtejshme eventuale tektonike dhe si duhet të ndërhyhet”, deklaroi Zoran Spirkovski, përfaqësues i Institutit Hidrobiologjik. /alsat-m/