Turqit kaluan natën në tenda

Turqit kaluan natën në tenda

Qindra të mbijetuar nga tërmeti në Turqi e kanë kaluar natën në tenda emergjence dhe përreth zjarreve.
Banorët e zonave të goditura janë porositur të mos hyjnë në ndërtesat e dëmtuara, pasi mund të rrëzohen si pasojë e dridhjeve të reja.

Tërmeti e kishte epiqendrën 500km në lindje të Ankarasë dhe kishte një fuqi prej 6 shkallë të Rihterit.

Të paktën 57 vetë kanë humbur jetën dhe dhjetëra të tjerë janë plagosur si rezultat i një tërmeti në Turqinë Lindore.

Tërmeti goditi pak pas orës 4.30 të mëngjesit dhe kishte një fuqi mbi 6 ballë. Autoritetet lokale në provincën Elazig thanë se një fshat ishte rrafshuar krejtësisht.

Skuadrat e shpëtimit kanë mbërritur në zonën e prekur më rëndë.

Gjysmëhëna e Kuqe e Turqisë ka ngritur çadra për strehimin e familjeve që kanë mbetur jashtë në kushtet e dimrit të ftohtë.

Pas tërmetit ka pasur afro 40 dridhje të lehta.

Turqia ndodhet në një zonë me aktivitet të lartë sizmik.

Mbi 17 mijë vetë u vranë nga një tërmet i fuqishëm në lindje të Stambollit në gusht të vitit 1999.

Cilësia e dobët e ndërtimeve u konsiderua atëherë si shkak i numrit të lartë të viktimave.

Për këtë ekziston ende shqetësim, pasi sizmologët kanë paralajmëruar një tërmet tjetër të fuqishëm brenda dekadave të ardhshme.