Përleshje e armatosur në qendër të Pejës, tre të plagosur

Përleshje e armatosur në qendër të Pejës, tre të plagosur

Pejë, 9 mars – Pejanët, me banim në qendër të qytetit, në orët e mesnatës i kanë zgjuar shpërthimet e të shtënat, të cilat atyre ua kujtuan ditët e vështira të luftës.
Mbrëmë, rreth orës 0,45 minuta, qendra e Pejës, hapësira ndërmjet ish-hotelit “Korzo” dhe lokalit “Dhoma”, ishte shndërruar në arenë të vërtetë lufte mes dy grupeve.
Pas një shpërthimi, sipas të gjitha gjasave – granatë e hedhur nga pusia, kanë nisur të shtënat, të cilat ndërkohë janë zhvendosur në Parkun e Vogël, përtej Bistricës. Për pasojë, sipas të dhënave të para, kanë mbetur tre të plagosur, kurse sulmuesit kanë ikur.
Policia e Pejës ka konfirmuar rastin, por nuk ka dhënë identitetin as të të plagosurve, as të sulmuesve. Po ashtu ka thënë se tash për tash nuk din as për motivet e kësaj përleshjeje, që ka shqetësuar aq shumë banorët e këtij qyteti, sidomos ata me banim në qendër të saj.
Sipas zëdhënësit të Policisë rajonale të Pejës, Xhevat Ibra, kjo përleshje e armatosur ka ndodhur rreth orës 00:45 minuta, në të cilën, siç tha ai, janë plagosur Xhevdet Kelmendi, Astrit Ibishi dhe Artan Cena, ndërkohë që ende nuk dihet se a është plagosur ndonjëri nga sulmuesit. Po ashtu nga Spitali Rajonal i Pejës merret vesh se, me gjithë plagët e rënda që kanë pësuar, jeta e të plagosurve nuk është në rrezik.
Policia, e cila ka gjetur dhe konfiskuar katër armë të gjata (A49) në Parkun e Vogël të qytetit, pohon se po merret me identifikimin e të gjithë pjesëmarrësve të kësaj përleshjeje të përgjakshme si dhe për zbulimin e motiveve dhe kapjen e sulmuesve.