Mediat izraelite: Lidhjet SHBA-Izrael në krizë

Mediat izraelite: Lidhjet SHBA-Izrael në krizë

Njoftimet në median izraelite thonë se ambasadori izraelit në SHBA, Michael Oren, duke folur për marrëdhëniet amerikano-izraelite ka thënë se ato ndodhen në një krizë të përmasave historike.
Ai njoftohet t'i ketë bërë këto komente në një konferencë me konsullin izraelit.
Marrëdhëniet amerikano-izraelite u përkeqësuan javën e kaluar, nga njoftimi i qeverisë izraelite gjatë vizitës së zëvendëspresidentit amerikan Xho Bajden se më shumë banesa për hebrenjtë do të ndërtohen në Jerusalemin e pushtuar lindor.
Kryeministri izraelit, Benjamin Netanjahu ka shprehur keqardhjen për kohën e bërjes së njoftimit dhe tentoi ta zbuste polemikën.
Por ai i tha sot parlamentit izraelit se projekti i ndërtimeve nuk lëndonte palestinezët dhe se ai do të vazhdonte.
Shefja e re e politikës së jashtme të Bashkimit Evropian, Kethërin Eshtën, ka thënë poashtu se vendimi i Izraelit për të ndërtuar vendbanime të reja në Jerusalemin e pushtuar lindor rrezikon bisedimet në Lindjen e Mesme.
Duke ju drejtuar Ligës Arabe në Kairo në fillim të vizitës së saj të parë në rajon, zonja Ashton tha se BE-ja i konsideron vendbanimet izraelite si të jashtëligjshme dhe pengesë për paqen.
Pas Kairos, Zonja Eshtën do të udhëtojë për në Siri, Liban, Jordani, Izrael dhe në Territoret Palestineze. /bbc/