Agjentët demantojnë arrestimin e zëdhënësit të al-Qaedas

Agjentët demantojnë arrestimin e zëdhënësit të al-Qaedas

Islamabad, 8 mars – Agjentët e shërbimeve të sigurisë së Pakistanit mohuan sot lajmin për arrestimin e zëdhënësit të al-Qaedas Adam Gadahn, i lindur në Kaliforni, koka e të cilit është vlerësuar një milion dollarë.
“Përshtypja jonë e parë ishte se kishim arrestuar Gadahnin, por ky informacion nuk është i vërtetë”, deklaroi një agjent i shërbimeve pakistaneze të sigurisë, i cili dëshiroi të mbetet anonim, raporton Reuters.
Ky agjent nuk dëshiroi të spekulojë se për kë bëhet fjalë, duke thënë se fjala është për një person, i lindur gjithashtu në SHBA, për të cilin besohet se është operativ i al-Qaedas.
Të njëjtën gjë e deklaruan edhe dy agjentë pakistanezë, duke kërkuar që të mos iu zbulohet identiteti.
Shërbimi pakistanez i sigurimit njoftoi dje se në Karachi është arrestuar Gadahn, menjëherë pasi që përmes video incizimit kishte ftuar myslimanët në SHBA të sulmojnë caqet amerikane dhe perëndimore.
Gadahn, i cili ka lindur në Kaliforni, është bërë mysliman dhe është bërë pjesë e al-Qaedas.