Katërshja mbështet një shtet palestinez

Katërshja mbështet një shtet palestinez

Katërshja për Lindjen e Mesme "mbështet me forcë përpjekjet" për krijimin e një shteti palestinez të qëndrueshëm dhe të pavarur, u shpreh sot sekretari i përgjithshëm i OKB-së, Ban Ki-moon, i cili ndodhet për vizitë në Ramallah, në Cisjordani.
"I mbështesim me forcë përpjekjet tuaja për krijimin e një shteti palestinez të pavarur dhe të qëndrueshëm", u shpreh shefi i OKB-së gjatë një takimi me kryeministrin palestinez Salam Fayyad në Ramallah, në Cisjordaninë e pushtuar.
Ban theksoi se Katërshja (OKB, Shtetet e Bashkuara, BE, Rusi), dha një mesazh të qartë dhe të fortë" për këtë qëllim dhe përsëriti dënimin për kolonizimin izraelit.
"I dënojmë ashpër, në emër të Katërshes, masat e fundit të marra nga Izraeli për ndërtimin e 1 600 banesave në një koloni në Jerusalemin Lindor të aneksuar", u shpreh ai.
Katërshja për Lindjen e Mesme bëri thirrje dje për ndalimin e kolonizimit izraelit dhe kërkoi hartimin e një plani për arritjen e një marrëveshjeje paqe brenda 24 muajve. /trt/